.
Epstein files मधून जे जे काही बाहेर येतं आहे ते भयंकर आहे.
Jeffrey Epstein हा माणूस आहे का सैतान?
त्याने इतक्या बालिकांचं लैंगिक शोषण केलं आहे.
त्यासाठी रितसर एक व्यवस्था उभी केली.
शाळकरी मुली निवडायच्या, त्यांच्या वर अत्याचार करायचा, पैसे द्यायचे आणि एकीला सांगायचं तुझ्या अजून दोन मैत्रिणींना घेऊन ये. त्या दोघी आणखी चार जणींना आणणार.
हे वर्षानुवर्षे चाललं होतं, यात मुख्य सहभाग होता Ghislaine Maxwell या त्याच्या girlfriend चा.
ती शाळांबाहेर फिरायची आणि सावज हेरायची.
असं एक जाळं त्यांनी तयार केलं होतं.
मग या मुली मोठमोठ्या सेलेब्रिटींना पुरवायच्या.
हे नामवंत, विचारवंत, अधिकारी, राजकीय नेते, हे यात सहभागी.
आपल्याला काहीच कळेनासं होतं.
यात बिल गेट्स चं नाव आहे, इंग्लंडचा राजा चार्ल्स चा धाकटा भाऊ ॲंड्र्यू आहे, बिल क्लिंटन आहे, विचारवंत चॉम्स्की आहे , डोनाल्ड ट्रम्प आहे.
जेफ्री एपस्टिन हा मध्यमवर्गीय कुटुंबात जन्माला आला, त्याच्याकडे पदवी नव्हती, खोटी प्रमाणपत्रे देऊन त्याने एका शाळेत नोकरी मिळवली. त्यानंतर तो शेअर मार्केटमध्ये गेला, एका कंपनीच्या खोट्या योजनेत सहभागी झाला. मग बिलिनेअरांचे अर्थकारण सांभाळू लागला, स्वतःची कंपनी सुरू केली आणि अक्षरशः एक साम्राज्य उभं केलं.
न्यूयॉर्क मधे महाल, फ्लोरीडा मधे प्रचंड मोठं घर, पॅरिस मधे मोठं घर, न्यू मेक्सिको मधे ranch, एवढचं नाही तर एक स्वतःचं स्वतंत्र बेट, स्वतः ची खाजगी विमाने, हेलिकॉप्टरे...
हे काय आहे?
Ghislaine Maxwell ही Robert Maxwell ची मुलगी. Robert Maxwell हे इंग्लंडमधील बडं प्रस्थ! प्रसिद्ध माध्यम सम्राट! ज्याचे राजघराण्याशी संबंध होते.
वडिलांच्या मृत्यूनंतर, त्यांचे गैरव्यवहार आणि कर्जबाजारीपणा बाहेर आल्यावर, घिलेन न्यूयॉर्कला आली. ती एपस्टिनच्या संपर्कात आली. ती मोठमोठ्या वर्तुळात वावरलेली होती, त्यातला सहजपणा तिच्यात होता, त्याचा एपस्टिनला फायदा झाला. मोठमोठी लोकं त्याच्या वर्तुळात आली किंवा तो त्या वर्तुळात शिरला.
गिलेन ला एपस्टिनची संपत्ती, पैशांचं पाठबळ हवं होतं ते मिळालं.
तिचे वडील आणि एपस्टिन यांच्यात खूप साम्य होतं. खोटेपणा, अफरातफरी, बायकांचा वापर करणं.
गिलेन ला एपस्टिनच्या कुकर्मांचं काही वाटलं नाही, तिला आधीपासून घरात सवय असेल.
आपण चक्रावून जातो, ज्याच्यावर तिचं प्रेम आहे त्या माणसाला ती मुली पुरवत होती!
सत्ता आणि पैसा, यांसाठी ती काहीही करायला तयार होती.
एपस्टिन आणि घिलेन दोघेही psychopath होते, narcissist होते.
अशांना समोरच्या माणसाला काय वाटत असेल, हे कळूच शकत नाही, empathy नाही, नसतेच.
इथे पुरूष बायकांचं शोषण करतो आहे असंच नाही. बाईच बायकांचं शोषण करते आहे.
मला असं वाटतं एका मर्यादेपलिकडे सत्ता मिळाल्यानंतर बाई किंवा पुरुष हा भेद न राहता, दोघेही अत्याचारी झाले तर त्याचा बाई किंवा पुरुष असण्याशी संबंध उरत नाही.
एपस्टिन आणि घिलेन अक्षरशः या मुलींच्या मनाशी खेळायचे.
एक मुलगी म्हणते, " मला माहित होतं की जितका जास्त मला त्रास होईल तितका त्याला आनंद होईल, मजा वाटेल.
एपस्टिनचं स्वतःचं बेट होतं, इथे तर मुली पूर्णच अडकलेल्या आणि परावलंबी. एक मुलगी समुद्रातून पोहत निसटून जायचा प्रयत्न करते पण सगळीकडे कॅमेरे लावलेले, बरोबर तिला पकडून परत बेटावर आणलं जातं.
तिथे बेटावर तर कुठलाच कायदा नाही. काय काय चालायचं, असं बोललं जातं, त्यात cannibalism आहे. मुलींना प्रेग्नंट करून त्यांची अपत्ये दिली जायची नाहीत.
एपस्टिन हे इतकं भयंकर, राक्षसी प्रकरण आहे सगळं, ना त्यावरची documentry, बघवते ना काही वाचायची इच्छा होते.
मुलींना मसाज करायचा म्हणून मसाज रूममधे न्यायचं, जे काही घडायचं ते त्यांच्या अंगावर यायचं.
शाळकरी मुली, ना कुठे बोलू शकायच्या, ना सांगू शकायच्या.
आपल्या पोटात कसंतरी होतं.
एवढंच नाही त्या आपल्या मैत्रिणींना घेऊन यायच्या. प्रत्येकीला पैसे मिळायचे.
शाळकरी मुली जे चाललंय त्याला विरोध करू शकत नाहीत, नाही म्हणू शकत नाहीत, त्यांचा मेंदू तसा तयार झालेला नसतो.
शिवाय, घिलेन अशा मुली निवडायची ज्या पिडीत आहेत, ज्यांच्या घरी अस्थैर्य आहे, आई वडिलांचं पटत नाही, ड्रग्स घेतात किंवा घरातून पळाल्या आहेत, किंवा बलात्कार झालेला आहे. त्या आधीच मोडलेल्या असतात.
या मुली वर्षानुवर्षे हा अत्याचार विसरू शकल्या नाहीत, कोणी व्यसनं करायला लागल्या, त्यांचा आत्मविश्वास गेला, त्यांच्यातलं अपराधीपण गेलं नाही, ते घेऊन जगणं अवघड होऊन बसलं. एपस्टिनने त्यांच्यावर अत्याचार तर केलेच पण पुढचं त्यांचं आयुष्य नरक करून ठेवलं.
हे करण्याचा त्याला काय अधिकार होता?
अशी माणसं स्वतःला कायद्याच्या वर समजतात, ते म्हणतील तो न्याय, त्यांच्या साठी ज्यांची आयुष्य खराब झाली, ती माणसं, त्या मुली केवळ कचरा. माणसं काय ती हीच. त्यांच्याखाली सगळे गुलाम.
एपस्टिनला स्वतः ची, उच्च प्रतीची, माणसं तयार करायची होती, त्याच्यापासून मुलं तयार करायची होती, त्यादृष्टीने संशोधन करायला तो प्रोत्साहन देत होता.
एपस्टिन खूप मोठ्या प्रमाणात देणग्या द्यायचा आणि मोठमोठी शैक्षणिक क्षेत्रातील धेंडं आपल्या बाजूला वळवून घ्यायचा,
किती उदार! किती दयाळू!
तो राजकीय कारणांसाठी देणग्या द्यायचा.
संशोधन करणाऱ्या संस्थांना देणग्या द्यायचा.
मुळात त्याला वेगळंच संशोधन करायचं आणि घडवून आणायचं असायचं.
शाळकरी मुली होत्या त्या बळी पडल्या.
ही मोठमोठी धेंडं कशी त्याच्या जाळ्यात अडकली?
असं म्हणतात की घिलेन अशा व्यक्तींना एपस्टिन वर्तुळात आणायची.
प्रिन्स ॲंड्र्यू तिचा मित्र होता. बिल क्लिंटन ला ती ओळखत होती.
बेटावर गेलेल्यांच्या यादीत खूप मोठमोठी नावं आहेत. स्टिफन हॉकिंग आहे.
चॉम्स्की त्याला सल्ला देतो आहे.
एपस्टिन फाईल्स मधे नाव आहे, म्हणजे ती व्यक्ती दोषी आहेच असं नाही. एपस्टिन हे बड्या वर्तुळातलं मोठं प्रस्थ होतं, काहींना त्याच्या काळ्या बाजूची कल्पना नसेलही.
असलेल्यांमधेही मोठी नावं आहेत.
ही माणसंही अनैतिक कृत्य करत होती. एपस्टिनने मुली पुरवल्या, यांनी वापरल्या.
आपल्याला आदर्श वाटणारी माणसं ही अशी सडलेली निघावीत?
असं का व्हावं?
उंचीवर पोचल्यावर माणसांना मी करीन ते न्याय! मी कायद्याच्या वर आहे, असं वाटायला लागतं की काय?
की प्रत्येक माणसातच हा असा घाणेरडा माणूस लपलेला असतो, तो सुपीक... (सत्ता आणि पैसा, बुद्धिमत्ता...मुबलक...अशा) वातावरणात फोफावत जातो, याला वेसण घालण्याचं बळ या नामवंतांमधे नव्हतं!!
यांच्या हाती जगाचा कारभार देऊन कसं चालेल?
मग कुणाहाती द्यायचा?
मुली सांगतात की एपस्टिन काय, घिलेन काय, त्यांच्याशी अतिशय मृदूपणे वागत, त्यांना भेटी देत, जणू त्यांची जवळची मित्र - मैत्रीण असावे. त्यांची स्वप्ने पूर्ण करण्याचं आश्वासन देत... मग त्यांच्याशी गैरवर्तन केले जाई.
आणि असं भासवलं जाई की हे लैंगिक गैरवर्तन जणू नॉर्मल, सामान्य गोष्ट आहे.
हे फोडण्याचे कृत्य कुणी करायला गेलं तर धमक्या मिळत.
हे जे काय चालू होतं... वर्षानुवर्षे चालू होतं... याची आपण कल्पना करू शकत नाही.
हे इतकी वर्षे उघडकीला का आलं नाही?
नक्कीच केवळ घिलेन आणि एपस्टिन दोघेच हे असं नेटवर्क विणू शकत नाहीत. अजून कितीतरी माणसं यासाठी काम करत होती. या मुली काही व्यावसायिक शरीरविक्रेत्या नव्हत्या. त्या अठरा वर्षांखालील मुली होत्या. हे काय त्यांना दिसलं नसेल.
एपस्टिन कडे पैसा होता, सत्ता होती, तो बड्या वर्तुळातला होता, मोठमोठ्यांशी त्याची मैत्री होती, म्हणून ते दबले? पैशाची गरज म्हणून त्याची नोकरी करत राहिले?
की अशा अतिश्रीमंतांचं हेच कल्चर आहे?
अनिल अवचटांच्या पुस्तकात निप्पाणीच्या विडी कामगार महिलांवरच्या अत्याचारांबद्दल लिहीलंय ते आठवलं.
छोटी-मोठी सत्ता आणि पैसा हातात असला की ती गाजवली जाते पहिल्यांदा बाईवर.
अशी उदाहरणे जगभर असणार.
पण एपस्टिनचं जाळं आणि त्याचा आवाका, त्याचे पोचलेले हात, भयावह आहे.
मती कुंठित होते.
आपण काहीच करू शकत नाही, ही हतबलता भयानक आहे, एक निराशा पसरते आहे. निर्बलता... दुबळेपणा... सगळ्याची किळस येते. उलटी येईलसं होतं. हे काहीही पचवणं शक्य नाही.
बधीर झाल्यासारखं
हे आपलं जग नाही.
हे कळलंच नसतं तर बरं झालं असतं.
ज्या मुली समोर आल्या, एपस्टिन आणि घिलेन, विरूद्ध बोलल्या, आपली ओळख उघड केली, त्यांच्या हिमतीचं खूप कौतुक आहे. व्हर्जिनिया रॉबर्ट्स ने प्रिन्स ॲंड्र्यू विरूद्ध गुन्हा दाखल केला आणि त्याच्यावर कारवाई केली गेली. ज्युली ब्राऊन या पत्रकार महिलेने या एपस्टिन प्रकरणाचं खोदकाम केलं, लावून धरलं. या संकटातून वाचलेल्या मुलींच्या वकीलांनी धैर्याने मुलींची बाजू लावून धरली.
आशेचे किरण आहेत.
बेलाट्रिक्सवर हॅरी 'पिडीतो' हा शाप टाकतो तेव्हा तिला काहीच होत नाही.
ती म्हणते," हॅरी हा शाप लागायचा असेल तर मनातून दुसऱ्या व्यक्तीची तडफड पाहण्याची इच्छा पाहिजे, ती होत असताना आनंद घेता आला पाहिजे तरच तो शाप लागेल."
आपण हॅरी सारखेच असहाय्य आहोत असं वाटायला लागलं आहे. अशा माणसांना 'Crucio - पिडितो' शाप देण्याची खूप इच्छा आहे,पण तो लागायचा नाही.
तीच हॅरीची ताकदही होती.
या सगळ्या अंधाऱ्या काळातून, (एकीकडे युद्ध सुरू आहे) , पुढे प्रकाशाकडे जाऊया, मैत्री - प्रेम - विश्वास - हीच आपली ताकद आहे.
महिलादिनाच्या शुभेच्छा! 🌹🌹
